you're reading...
News/ප්‍රවෘත්ති

පොත් ප්‍රදර්ශනේට ආපු ලක්ෂ 10යෙන් ගම්ලත් ශබ්දකොෂයක් ගත්තේ තුන්දෙනයි, දැනට අලෙවිය 435යි

gamlath

සුචරිත ගම්ලත්

මේ තාක් මුද්‍රණයවී ඇති සිංහල ඉංග්‍රි ශබ්ද කෝෂ අතුරෙන් ඉහළින්ම සිටින මහාචාර්‍ය සුචරිත ගම්ලත්  විසින් රචිත ඉංග්‍රීසි – සිංහල මහා ශබ්ද කෝෂය මේ තාක් අලෙවී වී ඇත්තේ පිටපත් 435ක් පමණක් බව කීවොත් ඔබට සිතෙන්නේ කුමක් ද?  දශ ලක්ෂයක් සෙනඟ ආවේ යැයි කියන සැප්තැම්බර් මාසයේ පොත් ප්‍රදර්ශනයේ දී  අලෙවි වූවේ ඉන් පිටපත් තුනක් පමණක් යැයි කීවොත් ඔබට සිතෙන්නේ ලැජජාවක් ද? දුකක්ද?  ඉන් සිංහලයින් ගැන කියැවෙන්නේ කුමක් ද?  එවැනි මහානර්ඝ කෘතියක් මුද්‍රණය කළ යුත්තේ ඊට අත දිය යුත්තේ  ආන්ඩුවක් විසින් නොවේ ද?  මහ රෑ මෝටර් සයිකල් තරඟ වලට කෝටි ගනනින් රජයේ ආදායම වැය කරන බජවි සංස්කෘතියක හෙළු වැල්ල  නොවේ ද මේ?

මේ වනාහී සුචරිත ගම්ලත් ශබ්ද කෝෂය මුද්‍රණය කර තවමත් ණය ගෙවන අර්ථපතියකු කියන කතාව ය.

සුචරිත ගම්ලත්ගෙ ශබ්දකෝෂයට එයාම කියන්නෙ අවුරුදු විසිතුනක් කියල. ඒ කෘතිය සංස්කෘතික අමාත්‍යංශයට ගිහින්, ගොඩගේ ආයතනයට ගිහින්,  ගුණසේන ආයතනයට ගිහින්, සරසවි ආයතනයට ගිහින්, රනිල් වික්‍රමසිංහ මහත්මය අතට ගිහින්, විවිධ තානාපති කාර්යාල ඇතුළු විශාල පිරිසකගෙ අතින් අත ගිහින් තිබුණ මොහොතක මට අශෝක හඳගම කියනව ‘මචං ඊළඟ ෆිල්මි එකට සල්ලි දාන්නෙ නැතුව  මේ පොත කරපන් ’කියල. මෙන්න මේ විදියට ඊළඟ ෆිල්ම් එක  කරන්න තිබුණ මුදල් තමයි මේකට යොදවන්නෙ. ගම්ලතුන් කවදාවත් කොන්දේසි සහිතව වැඩ කරපු මනුෂ්‍යයෙක් නෙවෙයි. නමුත් මම අහල තියෙනව; මලලසේකර ශබ්දකෝෂය තාපත් විකුණනව,. නමුත් ඒ සඳහා මලලසේකරයන්ට ගෙවල තියෙන්නෙ ඉතාමත් අඩු මුදලක් බව තමයි ආරංචි. ඒ අනුව මට මනුෂ්‍යෙයක් විදියට හිතුණ ඒක ලොකු අසාධාරණයක් කියල. මම දන්නව මේ ශබ්දකෝෂයේ මලලසේකරයට වඩා දහගුණයක් වචන වැඩියි. අලුත් වචන ලක්ෂ තුනකට වඩා තියෙන ශබ්දකෝෂය විශාල වශයෙන් අළෙවි වෙයි කියල මම හිතුව. ඒ නිසා මට මේ හරහා ප්‍රාග්ධනයක් ඒවි කියල මම හිතුව. කොන්දේසි රහිතව මේ කෘතිය කළොත් ඒක කතුවරයට විශාල අසාධාරණයක් වේවි කියල මම හිතපු නිසා ගම්ලතුන්ට කියනව එකඟතා ගිවිසුමකට අත්සන් කරමු කියල.  ගම්ලතුන් කියනව ‘මොන ඇග්‍රිමන්ට් ද උපුල්’ කියල. මම කියනව ‘නෑ සර් අපි ඇග්‍රිමන්ට් එකක් ගහමු’ කියල. සර් අහනව ‘මොකටද’ කියල. මම කියනව. ‘සර් මේ පොත මම ප්‍රින්ට් කරනව. මේක සර්ගෙ මාර්ස්ටර් පීස් එක. අනාගතයේ දවසක මේක විශාල වශයෙන් අළෙවි වෙන්න ඉඩ තියෙනව. (නමුත් එහෙමු වුනේ නෑ) ඒ නිසා ඔබෙන් පස්සෙ මේ පොතේ අයිතිය ඔබේ බිරිඳට, බිරිඳගෙන් පස්සෙ දරුවන්ට, ඉන් පස්සෙ මුනුපුරු මිනිපිරියන්ට යනවිදියට අපි දෙන්න ඇග්‍රිමන්ට් එකකට එමු’ කියල. සර් කියන්නෙ මොකක් ද?‘ඔයාගෙ කැමැත්තක් උපුල්’ කියල. ඊට පස්සෙ අශෝක හ්‍රදගමත් මාත් කතාකරනව අශෝක සේරසිංහ කියන නීතිඥයට. මොකද අපේ චිත්‍රපට දෙකකත් ඇග්‍රිමන්ට් ගැහුවෙ අශෝක සේරසිංහ නිසා. අද මේ ඔබයි මමයි සාකච්ඡා කරන මෙතන ම අශෝක හඳගමත්, ඉරන්ති අබේසිංහත්, සුචරිත ගම්ලතුත්, ඔහුගෙ බිරිඳත්, මගේ බිරිඳත්, මමත් අශෝක සේරසිංහ නිතිඥය ඉදිරියේ ඇග්‍රිමන්ට් එකක් ගහනව. ඒ නිසා ඉතා ම හොඳ කොන්දේසි සහිත ගිවිසුමක් යටතෙ තමයි මේ පොත මුද්‍රණය සහ ප්‍රකාශනය කළේ. මේ පොත මුද්‍රණය කලේ ඉන්දියාවෙ. මේක මුද්‍රණය කරල ඉවරවෙන කොට  ලක්ෂ පන්සියයක් වියදම් වුණා. අද වන විට මම මේ පොතෙන් විකුණලතියෙන්නෙ පිටපත් හාරසිය තිස්පහයි. මේපාර ජාත්‍යන්තර පොත් ප්‍රදර්ශනයෙදි විකුණල තියෙන්නෙ ශබ්දකෝෂ තුනයි. ඒ තුනෙනුත් එකක් ගත්තෙ කපිලකුමාර කාලිංග. එතකොට අමතර විකුණල තියෙන්නෙ දෙකයි. පොත් ප්‍රදර්ශනයට ලක්ෂ දහයක් ආව නම්,  ලක්ෂ දහයෙන් ම අහන්න ප්‍රශ්නයක් තියෙනව. මේ ලක්ෂ දහය අතරෙන් තුන්දෙනයි මේක ගත්තෙ. එහෙනම් මේක වටින්නෙ නැද්ද?  ඛේදවාචකය නම්; දැන් අවලාද ටිකත් මට, පාඩුවත් මට. ඔබයි මායි මේ ඉන්න ගොඩනැගිල්ලත්. මගේ මත්තෙගොඩ නිවසත් උගස් කරා මේ පොත මුද්‍රණය කරන්න. දෙකෙන් එකක් ගිය මාසෙ බේරගත්ත. අනිත් එකේ ණය මම තාමත් ගෙවනව. මම ඒ ලෝන් එක අරගෙන තියෙන්නෙ කොට්ටාවෙ H N B එකෙන්. ඒ ලෝන් එක නම් කරල තියෙන්නෙ ‘ඩික්ශනරි ලෝන්’ කියල. ඒකෙ පොලිය එකතු වුනාම දැන් ලක්ෂ හත්සියය පැනල. ඒ නිසා මම හිතනව මගේ ජිවිත කාලෙදි නෙවෙයි මගේ දරුවන්ගෙ කාලෙදිවත් මේ ඩික්ශනරිය විකුණල ඒකට වියදම් වුන මුදලවත් හොයන්න බැහැ. මම ලක්ෂ හත්සියයක් වියදම් කරල ලක්ෂ එක්දහස් පන්සියයක විතර අවලාද, අපවාද තොගයක්  මගේ එකවුන්ට් එකේ දාගෙන තියෙනව.

උපුටා ගැනුනේ දීර්ඝ සම්මුඛ සාකච්ජාවකිනි.  ඒ සඳහා පිවිසෙන්න  http://www.lankadaily.lk/interviews/item/492-2013-10-15-22-25-22

සංවාදය – ජයසිරි අලවත්ත විසිනි  m.j.alawatta@gmail.com This email address is being protected from spambots. You need JavaScript enabled to view it.

About sd

journalist and human rights activist

සංවාද

ප්‍රතිචාර වසාදමා ඇත.

%d bloggers like this: